Tidlegare forsking har vist at unge, ambisiøse idrettsutøvarar er spesielt utsett for skadar, sjukdom og for lite restitusjon.
Derfor blei undervisningsprogrammet “Nærmere Best” utvikla for å gje elevar på norske toppidrettsgymnas og ungdomsskular meir kunnskap slik at dei kan ta informerte val om eigen helse.
Nærmere Best
- Programmet består av ti ulike modular. Fire for ungdomsskular og seks på vidaregåande.
- Modulane har namna: prestasjonstrening, vekst og modning (pubertet),OBS-perioder, idrettsernæring, totalbelastning, restitusjon, treningsplanlegging og mental helse (psykt god).
- Utvikla av Senter for idrettsskadeforskning ved Norges idrettshøgskole.
- Les meir om programmet
Relevant og nyttig program
– Det overordna målet er å utvikle unge utøvarar utan å slite dei i stykker eller brenne dei ut, seier seniorrådgjevar på Skadefri-teamet, Hege Heiestad.
Nå har 20 skular tatt i bruk programmet over halvanna år, og tilbakemeldingane er gode.
– Både trenarar og utøvarar er strålande fornøgd. Dei opplever at det er både relevant og nyttig, og eit program dei ynskjer og fortsette å bruke, fortel Heiestad.
I doktorgradsprosjekt hennar har ho vore med på å utvikle og sette i gang programmet.
I siste fase har både skular og elevar kome med tilbakemeldingar gjennom spørjeskjema.
Helse før prestasjon
Det er ingen tvil om at "Nærmere Best" er eit program som det er behov for, seier sportsdirektør ved Noregs Toppidrettsgymnas, Øyvind Sandbakk.
– Nærmere Best er spesialdesigna for å gi elevane relevant kunnskap om ulike faktorar som bidreg til at dei held seg friske, skadefrie og motiverte over tid. Dette er grunnlaget for langsiktig utvikling i idretten, men også for eit godt og aktivt liv. Når trenarar og utøvarar lærer og praktiserer dette saman, med ei felles forståing og eit felles språk, bidreg det til å utvikle ein nasjonal kultur der vi set helse før prestasjon, eller kanskje like viktig: helse FOR prestasjon.
Det er nå inngått ei seks-årsavtale med WANG og NTG om å vidareføre og vidareutvikle “Nærmere Best”.
– Vi har svært gode erfaringar med store delar av programmet, medan andre delar framleis treng noko vidareutvikling. Nettopp derfor er vi no med, saman med WANG, på å vidareutvikle innhaldet og sikre at det er relevant for elevane våre. Det set vi stor pris på, og vi er trygge på at neste versjon vil treffe endå betre og leggje til rette for ei heilskapleg implementering nasjonalt, både ved toppidrettsgymnas og idrettslinjer, seier sportsdirektør Sandbakk.
Vidareutviklar “Nærmere Best”
Det er akkurat den utviklinga Heiestad og Skadefri-teamet på NIH er i gang med nå.
Heiestad fortel at skulane har gitt tilbakemelding på at den travle skulekvardagen er den største utfordringa.
Nokre skular gjennomfører ein modul per halvår, medan andre har gjennomført to til tre.
Kva for modular dei har brukt, er ganske forskjellig etter korleis dei passar inn i dei enkelte idrettane og til eige årshjul.
– Vi jobbar vidare med at terskelen ikkje skal vere for stor for å ta programmet i bruk. Vi må gjere det enkelt for skulane både å bruke det og hente inn nytt materiale. Tanken er at skulane stadig meir skal overta dette sjølv. Da er vår jobb å hjelpe dei med å bygge system slik at dette blir brukt over tid. Slik at dette ikkje berre blir eit nytt prosjekt som forsvinn når vi er ferdig, seier Heiestad.
Dei jobbar også vidare med ein ny digital plattform og ressursar og brukarhandbøker som er retta mot trenarar og foreldre.
Visjonen er også at elevar på ordinære idrettslinjer skal kunne ta i bruk enkelte delar av Nærmere Best.